Despois dun longo período de abstinencia recetil paneira, volvo ao ataque. Estou desatada, jejeje. Ou non fago nin un pan ou fago cincocentos nunha semana. Así son eu :).
O caso é que coa volta ao traballo… si, jeje, como traballo na casa teño a sorte de que podo poñer a levedar pans de levados infinitos e estar ao seu carón cando entran no forno. Que? Non todo ían ser contras no teletraballo, ou que? O caso ao que ía, que tendo máis tempo para estar na casa lanceime a recuperar as receitas dun curso online que fixen fai xa bastante tempo. Daquela pillárame con moito choio e non puidera facer todas as receitas, así que desta volta comecei pola primeira e rematei pola última. Xa as levo feitas todiñas. Non me lembraba do ben que estaba este curso. Se queredes algo sinxelo e moi visual co que formarvos nos básicos da panificación, este curso é de dez.
O caso é que hoxe tocoulle o turno ao pan de centeo. O resultado: espectacular. Cago na mar, se chego a saber antes que era así de fácil, non teríae estado dando voltas con outras receitas que non deron tan bo resultado.
Este pan non precisa apenas amasado. Só ten 2 horas de levado e non leva amasado polo que é moi rápido e práctico para facer se estades liados e queredes facer unha proba máis rápida que os habituais pans que hai que levar unha eternidade.
Eu usei a metade da fariña de centeo branca e a outra metade integral sen alterar nada máis e o resultado é que de dous bolos que había… xa só queda un.
Con esta receita saen dúas pezas de pan de 700 gr aproximadamente.
Para os que non tedes termómetro de comida: a auga a 60 graos é a que sae un puntiño antes de poñer a auga quente ao máximo de todo. Ao máximo de todo sae a uns 70 graos máis ou menos. Así que basta con parar antes e listo.
Nas notas veredes que se lle poden poñer sementes. Eu non llas agreguei porque un cliente plasta (correción feita por miña nai que di que non queda moi fino dicir que os clientes son plastas) cliente me chamou polo teléfono e cando me quixen dar conta, alá ían todas as sementes mouras que non había quen as comese.
Ingredientes
- 500 gr de fariña branca/integral de centeo
- 15 gr de sal
- 500 gr de auga a 60 graos
- 500 gr de masa madre natural de centeo
Elaboración
- Mesturar ben a fariña co sal e agregarlle a auga.
- Engadir a masa madre e mesturar ben.
- Repartir a masa en dous moldes poñendo 700 gr en cada un.
- Deixar fermentar durante 2 horas.
- Meter no forno prequencido a 250 gr durante 20 minutos e logo deixar outros 20 minutos a 220 graos. .
- Para darlle un toque máis de “brunch” pódense engadir 125 gr de sementes (pipas, sésamo, cabaza, liño, etc.) tostadas previamente no forno (a 200 graos durante 15 minutos) ou nunha tixola, e logo postas a remollo co dobre de auga. Hai que escoalas antes de agregalas á masa.
- A masa madre faise poñendo nun tarro a mesma cantidade de auga que de fariña de centeo (50 gr de cada). Cada 12 horas, tirase a metade desa masa e vólvese engadir a mesma cantidade de auga que de fariña. Así durante uns tres ou catro días ata que se vexa que na masa hai unhas burbullas.
- A auga é moi importante que sexa moi quente para facer un “falso” escaldado que permite que a masa colla máis sabor doce.
Aquí vos deixo un detalle da miga para que vexades qué pinta ten.
